Gouc’hmarc’hadoù : Diskaromp ‘ne !

Pa vez gwelet ar stumm ekonomikel o tiskarañ, a ziwaskadenn ekonomikel da wallzarvoudoù ekologel. Pa vez gwelet lodennoù renkadoù sokial a bezh o vezañ kaset kuit tamm ha tamm deus ar sistem. Pa vez gwelet penaos ez eo ar gouc’hmac’hadoù unan deus bizoù kentañ ar jiletennoù melen da stankañ ha da okupiñ. Talvezout a ra splann an doare ma vez al lec’hioù-se o vreinañ hor buhezioù.

En desped d’ar fed ma vez pinvidikaet nemet ul lodennig deus ar re binvidikañ dija e kendalc’h an dilenidi da sinañ, loc’h eno, peadra evit ma vije brasaet pe gwasoc’h zokenn savet zonenoù kenwerz nevez.

Pa vo savet pe brasaet ar zonenn kenwerzh o tont e vije brav kaout soñj deus sifroù zo

Dibaoe 5 bloaz er stad c’hall, ar m² kenwerzhel a gresk 2 pe 5 gwech buhanoc’h evit ar boblañs (hervez al lec’h).

Ar savadurioù kenwerzh goulo a zo tremenet deus 6% da 12% etre 2010 ha 2016.
E bro Frañs e vo kavet etre 20 ha 25 million a m² kenwerzhel dilaosket e 2025.

Perak e vez kendalc’het ganto war an hent-se ? Un hent a brofit nemet d’un nebeut aozadurioù deus ar CAC40 met a zo spontus da lodenn vrasañ ar boblañs. Diaes eo ‘vidomp kompren an doare-se da aozañ an tiriad, na spi, na ijin ebet ganti, didalvoudus met lakaet e plas dizehan dibaoe ar bloavezhioù 1970….

Setu penaos e welomp ni monopol ar gouc’hmac’hadoù :

Distrujet eo an douaroù gounezel (labour-douar)

Dibaoe 2006 ez eo bet distrujet e Breizh (B4) 30 000 ha a douaroù mat da labourat, er c’hontrol ez eo kresket an takadoù kalvezadel da 34 000 ha. An takadoù-se a gemer 12,8% deus an douaroù e Breizh enep 9,3% e bro Frañs. 30% deus ledanadur ar c’herioù a zo krouet abalamour d’ar zonennoù kenwerhzel.

Dismantr ar c’henwerzhioù lec’hel

Muioc’h mui a gummunioù a vez ganto ur c’hreiz-ker o vont da get. Ar c’henwerzhioù a serr o dorioù an eil war lerc’h ar re all hag hor c’heriadennoù a varv tamm ha tamm. Al lec’hioù-se ‘oa koulskoude lec’hioù ma c’helle an dud kejañ an eil ouzh ar re all. Distruj ‘ne a laka an dud da chom pep hini b’ar ger, mervel a ra neuze buhez ar gumun ha ganti ar gallout da gaozeal, d’en em aozañ tro dro d’ur politikerez dazeilat.

Dismantr al labour

Lod brasañ an arverioù krouet a zo labourioù is-paeet, bresk, ha d’an aliesañ vez lakaet ar merc’hed war an dachenn. Al labourioù-se ‘zo dispriziet ha diaes-tre. Alies vez krouet freuzioù fizikel abalamour d’ar c’hargoù pounner pe d’ar gestroù graet hag adgraet o chom difiñv. Priziet eo bet ganeomp ar feur evit ul labour krouet en ur gourmarc’had a zistruj etre tri ha pemp labour all er c’henwerzhioù bihan, en artizanerezh, pe el labour-douar. Gaou eo neuze pez vez gwerzet deomp gant ar c’henwerzhioù bras. traoù faos nemetken a zo lavaret ganto.

Dalc’het vez gant ul labourerezh-douar stank ha dismantrus ha laosket vez da goll ul labourerezh-douar a galite.

Abalamour d’ar gwask lakaet gant ar gourmac’hadoù war ar peizanted, pa z’eont da brenañ o broduioù d’ar brizioù izelañ, e wellomp hiriv an deiz bed al labour douar o treiñ d’ar gallhuñvre. Muioc’h mui a beizanted a choaz d’en emlazhañ e Breizh ha ne baouez ket an tiez-feurm da vont da get. Ar re a chom n’o deus ket choaz ebet all ‘vit brasaat ha en em ledanaat hep derc’hel kont deus ar c’hondisionoù spontus krouet. Ar sikourioù roet evit distreiñ d’ur sistem bevus a chom rall hep c’hoant gwir ebet deus perzh ar stad hag ar politikerezh da cheñch an traoù da vat. Hag etrezek a re a chom a enep d’ar cheñchamantoù-se e kavomp ar gourmac’hadoù evel just. Ar re-se o deus ezhomm deus ul labourerezh-douar greantel kaset a-benn gant ar produioù kimiek gwerzet ivez ganto.

Dismantr hor endro

D’ar pellañ ma c’hellomp sellet, ne vez gwelet nemet zonennoù marvet. O vont kuit deus ur c’hêr ‘vit mont betek un eil, ne vez nemet savadurioù diene d’ar gwelet o vreinañ an egor. Ouzhpenn d’ar grevusted ekologel, ez eo ar zonennoù-mañ un dismantr denel, ur vuhez kolektivel diazezet war ar bevezerezh hag a lak an dud da vezañ troet warno o unan. Ar chema-se a vount an tiriad d’en em aozañ dre heñchoù disheñvel : zonenn kenwerzhel, zonenn dudi, zonenn oberiantel, kouskvaoù divent… Hag n’eo ket aes tremen d’ur zonenn d’egile evel just, rediet vezomp da fiñval ha da saotrañ war omp lerc’h neuze.

C’hoari al lu gant hor sevenadur sokial hag istorel

Indentelezh ha sevenadur Breizh zo lakaet ‘giz ur folklor ‘vit gellet gwerzhañ ‘ne gwelloc’h. Gwerzhet gant ar re a zistruj ar sevenadur-se o vountañ pep hini war zu ar skoueriekadur. Biskoazh ne talc’ho Breizh ouzh ur sac’h Leclerc.

Ar memes chema zo lakaet da red dibaoe 50 vloaz, gant ar memes gwallzarvoudoù ekonomikel hag ekologel o heuliañ. Da bep dilennadeg ez eo ar memes raktresoù, gant ar memes chema, hag an tiriadoù tro-dro a zismantr tamm ha tamm.

War ar bilañs ez eo sklaer hiriv, studiadennoù ekologel spontus ha dispi. Breizh a bae uhel priz an aozadur tiriadel breiñ-se. Aozadur an tiriad a rank bezañ graet gant ar vretoned ha n’eo ket evit uhelvennad ar c’hevalaouriezh.

Hor dilenidi a gomz deomp jentilig, evit parkañ ac’hanomp gweloc’h war lerc’h.

Deomp ni da gas war raok al luskad evit adtapout an dorn war hor tiriadoù ! Boycott ha dismantr ar gourmarc’hadoù !

Dispac’h, d’an 21 a viz Mae 2019