Chomons la Bertègn de botin ! Defendons le peupl berton !
Coment qe c’ét pour la Bertègn és jous-li ?
La qhulture bertone ét su l’empere, le nombr de siens e de sienes a caozer berton e galo ét decréssu de maitië en 6 anées de temp, n-i a ben du aria den les ôpitaos, de pus en pus fort de deu a se lojer e la condicion de l’entour rempire core. Més le Consail Rejionao e l’Etat françaez ne font yeûs ren qe de berdacer la-dessu e i nous content qe n-i a afére d’armer la Bertègn, la France e l’Urope d’ertour ! Je velons nous vivr, i velent yeûs la ghere e l’aqhit !
En ataqe nôtr qhulture, qe ben des bertones e bertons s’erqenéssent den yelle.
N’i a pouint d’elijes assë a y’étr minzes den le galo. N’i a pouint de respet pour les ecoles Diwan : en lous bâtit un ôtë qe les eblluçons ne sont pouint pour vivr deden, come su Caraez, ou ben en fèt pâsser permier de chomer un eutin su Perros en pllace qe de bâti un coleje. Les afétûres qhulturales ont yelles etout ben du deu o les fezantes de rudou qi pezent su l’ouvraije de miles de tarvâillou·ere·s e etourmou·ere·s.
Més i n-n a core d’aotr ! Les ôpitaos sont ben admao partout par la Bertègn come su Redon, Ghingamp e Caraez. Nôs russiaos, nôs cllôz e nôs gréves sont de pus en pus ensouies a caoze d’eune agro-uzinerie hachouze pour l’entour e le monde vivant. Pour ce qe n-i a de se lojer, la Fondation pour le Logement des Défavorisés enqhuze qe n’i a « pouint de reponse politiqe en pus des poucedûres a durzi […] ben pus a l’amain des pourpiétéres qe des louous ». Sans conter etout des fomes, des minouretës (de jenre, de relijion ou d’aotrs), des holandë·ée·s,… qe n-i a tenant davantaije de flleulerie e de pôvertë den lous condicions de vie. Ça qi fèt don ben manqe eune moucelée d’ohis qe le monde tre-la-drete ne veût pouint e ne peut pouint i terouer le chieu, come i n’ont ren de pus qe la separtézon e la hourmenerie a ôfri.
Je chonjons nous-aotrs qe n-i a afére d’entr-layer les maintieunes luteries qe n-i a en Bertègn, q’a sejent qhulturales ou ben sociales, a caozent q’a regardent tertout.
J’arions-ti don d’ergarder l’Etat françaez e la pitaoderie, ben boudettement, cant q’i sont a aboli nôtr qhulture e nôtr peupl ?
Nennin pouint, demézë c’ét de paisser e de gagner nôtr chouézi pour nous-aotrs ! Je ne demanderons pus herme a Pariz. J’avons qe de nous chevi tous sous de nôtr qhulture, nôtr valant, nôtr qenomie pour qe tertout s’eblucejent de Brest jeq’a Cllisson. Demézë c’ét de chomer un pouvouér politiqe berton.
La Saint-Ive, q’ét la féte de la Bertègn ét entour du 19 du mouéz de mai. J’avons chouere d’erprendr la merqe-la de d’aotrfai a n-en fére eune merqe detourbouze pour la luterie du peupl berton.