Haopée a l’unitë d-s ouveriér·e·s berton·e·s
Dedpès qe ça fut concrayë, la devocion de Dispac’h ét d’amain déheûdist e revolucionist. Raport és darains chanjements politiqes, j’ons afére d’acertainer a cller nôtr rande politiqe e n-s engaijements.
« Ne roûje, ne bllan, bobiaos soument »
Lés manieres d’unitë de l’Emsav sont d’ertour core. N’n-i a pouint ren de nouviao la deden raport qe c’ét de cai q’ét bani par ceusse qi, d’o ene idée nacionalist romantiqe e romatizée, vouraent qe l’Emsav ne seraet pouint politiqe en ren. Lés siens-la chonjent qe j’arions meillou temp qe d’aler pus lein, peuchalair lés tabuts d’idées qi ne seraent pouint d’amain astoure pour yeus-aotrs, assourfin d’avanjer a un méme abutement pour tertous, dés recllâmeries d’unitë bertone. I sont menës par dés simboles d’istouère d’ene nacion d’un milier d’anées q’ét le fondement de lou luterie. Ét a caoze d’ela q’i qe ne font pouint ren qe de qhuter la luterie dés cllâsses e renveyer la luterie contr lés pitaods a pus tard den le temp.
Le “na ruz, na gwen” ne fét pouint ghère deûz d’o le “ne de gaoche ne de drete” a Macron e la n’ét pouint ren q’ene meniere du couin de le bani. N’n-i a qe la drete qi perfite TERJOUS d’este rande politiqe : “l’union sacrée” deqenés TERJOUS l-s ouveriér·e·s. L’union espere TERJOUS dés dons d-s ouveriér·e·s sans pouint jamés ren fére pour yeus-aotrs. En pus, l’union perpoze tenant ene meniere de vaer la nacion q’ét guerouée, fllejée, ene meniere de vaer la nacion vra gandilleûze qe je refuzons d’i prindr part.
Dispac'h !
Côme paissou·ere·s revolucionists, j’ons de yètr cller asséz don e de nous pôzer contr l-s aliances entr-lés-cllâsses-la. Je ne serons pouins bllechards face a nôtr engaijement. N’n-i a pouint qhite és ouveriér·e·s berton·e·s a pâsser d’un Etat pitaod françaez a un Etat pitaod berton. Je n’ons pouin aoqhun méme abutement o la bourjouézie, q’a seje françèze ou bertone. Je ne tabuterons pouint o ceusses qi abrâzent nôtr entour. Je ne ferons pouint aliance o ceusse qi nous minent. Je ne defenrons pouint un projit de nacion fromée e filomist.
Nôtr devocion ét revolucionist. Je ne sôme pouint a luter pour chanjer la coulour de la baniere su le pouillement és archérs.
Deheûder la nacion ao peupl berton n’ét pouint separabl de dehêuder le peupl berton socialement.
Je sôme ben evië·ée·s du fét qe la rande revolucionist-la fut deqenûes durant ben du temp, je haopons tertous, lés siens e lés sienes qi s’erqenéssent den la luterie revolucionist pour le peupl berton a n-s erjouindr assourfin de se ramarer e porter pus haot nôtr messaije.
Contr l’union sacrée, roûje e nair de bout en bout, ne bllan ne blleu, haopée a l’unitë d-s ouveriér·e·s revolucionists de Bertègn !